Секој граѓанин да може да одгледува 2-3 стебла Канабис за лична употреба под строга контрола – изјави премиерот Заев на парламентарната седница посветена на пратенички прашања.
Денес се одржа собраниската седница посветена на пратенички прашања. Меѓу другото на премиерот му беше поставено прашање во врска со одгледувањето на Канабис во строго контролирани услови и во нашата земја. Тој истакна дека со легализацијата и декриминализација на канабисот се отвора можност, секој граѓанин, за своја лична употреба да може да огледува одредена количина на канабис.
„Нашиот став во однос на ова прашање е јасен. Ова нема да биде привилегија само на богатите да инвестираат или слично. Целта е да се овозможи на секој граѓанин на пример од две до три стебла под контрола на агенцијата која што е предвидена во самиот закон за сопствена потреба да може да ги користи, или пак може да ги делегира на компанија да ги одгледува за него како што и сега. Се бележи секое стебленце со посебен број со посебна контрола или слично.„ порача премиерот Заев.
Со легализација на канабисот истовремено се отвораат нови економски потенцијали и развој на одредени стопански гранки како туризмот и угостителството.
„Легализацијата на марихуаната во државата која што треба да има конечна цел за развој на угостителството и туризмот на сите наши услужни дејности кои што дефинитивно многу малку партиципираат во севкупниот БДП на државата односно околу 4%.
Во Холандија во БДП, услужните дејности учествуваат повеќе од 60%, во земјите насекаде е 25, 45, 35 отсто. Ние немаме море, немаме пристаништа, немаме извори на нафта да го развиваме нашиот економски сектор. Ова е добар потенцијал што државата може да го искористи за развој на економијата за отворање на нови работни места”.
Искуствата покажале дека во сите земји каде што употребата на канабис е легализирана, за 30 до 50 отсто е опаднато користењето на сите други тешки супстанци и дроги.
Сепак, првин треба сериозна дебата за декриминализација и легализација на марихуаната за да се слушне гласот на народот. Негов личен став е дека тоа треба да се случи час поскоро.
