Во Македонија активно работат 172 земјоделски здруженија, од мали селски здруженија на тутунари до национални федерации на фармери. Ги издвоивме од регистарот на граѓански организации и ги подредивме по региони и општини. За секое здружение ги наведуваме областа, општината, годината на регистрација и е-поштата. Ако сте земјоделец што бара здружение, откупувач или институција што бара партнер, тука ги имате сите на едно место.

Листа на земјоделски здруженија по региони

Кликнете на вашиот регион и ќе се отвори табела со сите здруженија, подредени по општина. Сојузите и националните асоцијации се означени со потемна ознака. Со клик на е-поштата директно им пишувате.

Кои земјоделски здруженија ги има најмногу?

Ги поделивме здруженијата според производството што го наведуваат во називот. Кај повеќе од третина не е наведена одредена култура. Тоа се општи здруженија на земјоделци од едно село или општина.

Тутунарите – најорганизирани земјоделци

Ниту една друга култура нема толку здруженија како тутунот. Од 34 здруженија на тутунопроизводители, 22 се во Пелагонискиот регион: Долнени (7), Прилеп (6), Кривогаштани (5), како и Крушево, Могила, Демир Хисар и Битола. Во Струмичко се активни четири здруженија во Василево. Имињата често кажуваат сè: „Последна надеж на тутунарите“, „Мака на тутуноберачите“, „Утрата на тутунарите“. Тутунарите се организираат затоа што секоја година преговараат за откупните цени и роковите за плаќање.

Сточари и автохтони раси

Сточарските здруженија се помалку, но многу се специјализирани. Има здруженија на одгледувачи на холштајн и црно-бели говеда, на овци и кози од Пелагонија и Западна Македонија, но и здруженија за зачувување на автохтоните раси: праменката овчеполка и каракачанка, балканската коза, бушата и ваташките кокошки од Кавадарско.

Лозари, винари и органски производители

Лозарските и винарските здруженија се собрани околу Кавадарци и Скопје, каде е и Здружението на винари. Органските производители имаат 14 здруженија и своја Федерација на органски производители со седиште во Струмица.

Национални сојузи и асоцијации на земјоделците

Покрај локалните здруженија, земјоделците се организирани и во поголеми сојузи, федерации и мрежи. Тие ги застапуваат земјоделците пред Министерството и учествуваат во изработката на законите и мерките за поддршка.

Каде има најмногу земјоделски здруженија?

Пелагонискиот регион води со 41 здруженија, најмногу поради тутунот. Скопскиот регион е втор со 39, бидејќи таму се седиштата на повеќето национални асоцијации. Полошкиот регион има само 5 земјоделски здруженија, иако земјоделството таму е развиено.

Зошто вреди да членувате во здружение?

• Посилен глас при откупот. Здружените производители полесно преговараат за цена и рок за плаќање.
• Информации за субвенциите. Здруженијата први дознаваат за повиците и помагаат околу апликациите.
• Заеднички набавки. Ѓубриво, заштитни средства и опрема се поевтини кога се купуваат заедно.
• Обуки и совети. Предавања, посети на фарми и размена на искуства меѓу членовите.
• Учество во законите. Преку сојузите земјоделците даваат мислење на законите, како Законот за уредување на пазарите со земјоделски производи, кој деновиве е на јавна расправа.

Како е составена листата?

Листата е изработена од регистарот на граѓански организации, во кој има околу 17.000 записи. Ги издвоивме здруженијата што во називот имаат земјоделски зборови, како земјоделци, фармери, тутун, сточари, лозари, овоштари и органско производство, и потоа рачно ги проверивме. Ловечките, пчеларските и здруженијата за рурален развој ги објавивме во посебни листи. Неактивните здруженија не се вклучени.

Најчесто поставувани прашања

Заклучок

Со 172 активни земјоделски здруженија, македонските земјоделци не се толку неорганизирани како што изгледа. Тутунарите покажуваат дека кога има заеднички проблем, луѓето се здружуваат. Ако барате здружение во вашиот крај, отворете го вашиот регион, пишете им и прашајте за членството.