Антракноза на лубеницата – Colletotrichum orbiculare
Опис: Паразитот ги напаѓа сите надземни растителни делови. На листовите се забележуваат тркалезни некрозни дамки со белузлавосива боја, обрабени со темнокафеав раб.
Понекогаш ткивото во некрозните дамки пука.
На стеблото се развиваат вдлабнати рани со кафеаво – црвеникава боја.
Раните, при основата на стеблото навлегуваат длабоко, поради што настанува венење на растенијата.
Најкарактеристични промени се развиваат на плодовите. На нив се развиваат многубројни и тркалезни вдлабнати рани, белузлавосиви ограничени со темнокафеава до црвеникава маса, во која се наоѓа мицелија и конидии од габата.
Вдлабнатите рани на стеблото и на плодовите претставуваат плодни лежишта од габата. Паразитот презимува во семето и во растителните остатоци до 5 години. Конидиите се разнесуваат со водата за наводнување, инсектите. Инфекциите се остваруваат директно преку епидермисот.
За да настане инфекција растителните делови треба да бидат навлажени. Инкубациониот период изнесува 6 – 7 дена и болеста се развива при топло, влажно и врнежливо време.
За спречување се препорачува употреба на здраво семе и уништување на растителните остатоци. За заштита на растенијата може да се користат некои фунгициди како манкозеб, цинеб, манеб, фолпет, пропинеб и др.
Антракноза на лубеницата – Colletotrichum orbiculare може значително да влијае на економските штети при одгледувањето на лубеницата.
При врнежливо време третирањата да се изведуваат на седум дена.
За повеќе корисни стории посетете ја страната на zemjodelie.mk, како и Земјоделските групи на Facebook и Viber.
