Легнаа субвенции за овоштарите: исплатени 338.468.141 денари за 9.567 корисници
На сметките на овоштарите се изврши исплата на субвенции во вкупен износ од 338.468.141 денари, наменети за 9.567 корисници, информираат од Министерството за земјоделство, шумарство и водостопанство.
Исплатата е реализирана согласно Мерка 1.6 – директни плаќања по обработлива површина за одржување на постоечки овошни насади, која е наменета за поддршка на земјоделците што одгледуваат овошни насади и работат на нивно редовно одржување.
Со оваа исплата, овоштарите добиваат финансиска поддршка која треба да помогне во покривање на дел од трошоците за тековното производство, како што се заштитни средства, прихрана, наводнување и други агротехнички мерки, особено во период кога производствените трошоци се зголемени.
Овоштарството е една од поважните гранки во македонското земјоделство, со значително учество и во извозот. Редовната и навремена исплата на субвенциите е од особено значење за одржување на ликвидноста на земјоделските стопанства и планирање на следната производствена сезона.
Земјоделците кои имаат прашања во врска со исплатата можат да извршат проверка преку електронските системи на Платежната агенција или да се обратат во подрачните единици за дополнителни информации.
Придружете се во нашата заедница на Земјоделие.мк на Вибер, Телеграм, Фејсбук бидете дел од најголемето земјоделско семејство во кое сте секогаш добредојдени.
Доколку нешто продавате или купувате посетете го огласникот WWW.PETEL.MK
