Земјоделски површини во Македонија – Македонија губи земјоделски површини: лозјата и пасиштата во пад, овоштарниците растат

Земјоделски површини во Македонија – Македонија во 2024 година има помалку земјоделска површина отколку пред десет години, а намалување има и кај лозјата и пасиштата. Истовремено, овоштарниците бележат раст, што покажува дека структурата на користење на земјиштето постепено се менува.

Според податоците од Државниот завод за статистика, вкупната земјоделска површина во Македонија во 2014 година изнесувала 1.263.155 хектари, а во 2024 година изнесува 1.241.613 хектари. Тоа е намалување од 21.542 хектари за една деценија.

Пад има и кај вкупната обработлива површина, која се намалила од 511.579 хектари во 2014 на 506.586 хектари во 2024 година. Кај ораниците и бавчите намалувањето е од 413.249 на 408.055 хектари, односно за 5.194 хектари.

Лозјата се намалуваат, овоштарниците одат нагоре

Најинтересниот дел од статистиката е што не се движат сите категории во иста насока.

Во 2014 година Македонија имала 23.061 хектари лозја, а во 2024 година таа бројка паднала на 21.984 хектари. Тоа значи дека за десет години државата изгубила 1.077 хектари лозја.

Во истиот период, овоштарниците се зголемиле од 15.309 на 16.934 хектари. Тоа е раст од 1.625 хектари, или нешто повеќе од 10 проценти.

Овие бројки покажуваат дека дел од земјоделското земјиште не исчезнува целосно, туку се менува неговата намена и структура.

Пасиштата се намалени за речиси 17.000 хектари

Голем пад има и кај пасиштата. Во 2014 година Македонија имала 751.086 хектари пасишта, а во 2024 година има 734.304 хектари. Тоа е намалување од 16.782 хектари.

Овој податок е важен и за сточарството, бидејќи пасиштата се директно поврзани со можностите за одгледување добиток и со одржувањето на руралниот простор.

Каде има најмногу земјоделска површина

Според податоците за 2024 година, меѓу општините со најголема вкупна земјоделска површина се:
Битола со 85.286 хектари,
Прилеп со 73.168 хектари,
Гостивар со 66.266 хектари,
Велес со 56.226 хектари,
и Скопје со 54.109 хектари.

Кај овоштарниците, најмногу има во Ресен со 3.137 хектари, додека кај лозјата убедливо води Кавадарци со 4.582 хектари, пред Неготино со 2.669 хектари и Гевгелија со 1.637 хектари.

Што покажуваат бројките

Новите бројки јасно покажуваат дека Македонија во последната деценија полека ја менува сликата на земјоделското земјиште. Вкупната земјоделска површина се намалува, лозјата и пасиштата се во пад, а овоштарниците одат нагоре.

Тоа отвора важно прашање:
дали земјоделците се пренасочуваат кон покултури што се поисплатливи, или дел од земјиштето едноставно се напушта?

Како и да е, статистиката покажува дека земјоделската карта на Македонија денес не е иста како пред десет години.

Извор: Државен завод за статистика

Табела за во текст

Придружете се во нашата заедница на Земјоделие.мк на Вибер, Телеграм, Фејсбук бидете дел од најголемето земјоделско семејство во кое сте секогаш добредојдени. 

Доколку нешто продавате или купувате посетете го огласникот WWW.PETEL.MK