Како одминува летото, има сè помалку култури за топлата сезона што ќе можете да ги засадите. Доцна боранија е една од културите што можете да ја садите среде лето и да имате жетва во релативно краток период.
Кога садите доцна боранија, важно е да се обрне внимание на сортата, бидејќи ви треба боранија што расте брзо и стасува брзо за берба. Видовите грмушки обично се препорачуваат за овој период на садење, бидејќи им треба помалку време да развијат лисна маса.
Постојат многу видови кои достигнуваат зрелост за околу 60 дена. Обавезно погледнете го пакетот со семе колку време е потребно да созрее. Ако тоа е 60 дена, додадете уште 10 дена на тој број за да го вклучите скратувањето на денот, односно падот на сончевата светлина, што исто така влијае на брзината на развојот на растението.
Совети за одгледување доцна боранија
- Додадете компост или ѓубриво во почвата, дури и ако сте го направиле тоа на пролет. Ова ќе им даде на растенијата добар и брз почеток.
- Наводнете ја почвата пред садењето. Водата ќе ја олади почвата малку, а влажната почва ќе го забрза ‘ртењето. Многу семиња нема да можат да ‘ртат ако условите се премногу жешки.
- Ако е премногу топло, додадете многу тенок слој на прекривка. Тоа ќе одржи пониска температура на почвата, како и влага.
- Редовно наводнувајте, но оставете ја почвата да се исуши помеѓу наводнувањата за да не изгние семето. Не оставајте ја почвата сува повеќе од еден ден.
- Внимавајте на штетниците и болестите. На есен има повеќе штетници и помалку растенија, а инсектите активно бараат нови растенија, па затоа боранијата може да биде лесна мета.
- Ако времето стане ладно пред бербата, заштитете ја боранијата навечер со навлака. Можете да користите ткаенина, пластична фолија, весници. Обавезно извадете ја прекривката наутро.
- Берете млада боранија. Доколку времето е соодветно, вашето растение ќе произведува плодови додека мразот не го убие.
За повеќе корисни стории посетете ја рубриката Агро совети, како и нашите социјални мрежи Facebook и Viber.
