Штети од пролетен мраз – НеготиноЛозовите насади и овоштарниците најпогодени од ниските температури и сланата
Општина Неготино ги повика сите земјоделци кои претрпеа штети од пролетниот мраз и ниските температури што го зафатија регионот на 2 мај 2026 година, навремено да ги пријават оштетувањата врз земјоделските култури.
Според информациите од локалната самоуправа, невремето проследено со слана предизвикало сериозни последици кај дел од лозовите насади, овоштарниците и други чувствителни земјоделски култури, особено во повисоките и поотворени делови на неготинскиот регион.
Пријавувањето на штетите ќе се врши во салата за состаноци во зградата на Општина Неготино, секој работен ден во периодот од 08:00 до 16:00 часот.
Формирани стручни комисии за проценка на штетите
Градоначалничката на Општина Неготино, Марија Нацева, информираше дека веќе се формирани стручни комисии кои ќе извршат теренска проверка и проценка на степенот на оштетување.
По претходниот увид на терен, најголем дел од пријавените проблеми се однесуваат на лозовите насади, каде ниските температури и утринската слана предизвикале оштетувања на младите ластари и родните пупки.
– Ги повикуваме сите земјоделци кои претрпеа загуби, особено кај лозовите насади, навремено да ги достават своите пријави до членовите на комисијата за да можеме ефикасно да ја утврдиме реалната состојба на терен – истакна градоначалничката Нацева.
Земјоделците стравуваат од дополнителни загуби
Пролетниот мраз и сланата годинава предизвикаа проблеми во повеќе земјоделски региони низ Македонија, а лозарите предупредуваат дека штетите може дополнително да се почувствуваат во наредниот период, особено доколку следуваат нови температурни осцилации.
Во Тиквешкиот регион, лозарството претставува една од најважните економски гранки, па секое поголемо оштетување директно влијае врз приходите на голем број семејства кои егзистираат од производство на грозје и вино.
Земјоделците апелираат институциите навремено да ги обработат пријавите и да се обезбедат мерки за поддршка и обесштетување на погодените производители.
Придружете се во нашата заедница на Земјоделие.мк на Вибер, Телеграм, Фејсбук бидете дел од најголемето земјоделско семејство во кое сте секогаш добредојдени.
Доколку нешто продавате или купувате посетете го огласникот WWW.PETEL.MK
