Полска бара Европската унија да ги искористи сите расположливи средства за да го ограничи количеството на украинско жито што влегува на пазарот. Ова го изјави премиерот Матеуш Моравјецки поради незадоволството меѓу земјоделците поради влијанието на увозот врз цените на житото во Полска.
Растечкиот гнев меѓу земјоделците поради приливот на украинско жито е голема главоболка за полската владејачка националистичка партија во изборна година. Особено што нејзината конзервативна гласачка база главно живее во руралните области и малите градови, објави Ројтерс.
– Бараме употреба на сите регулаторни инструменти – квоти, тарифи.. Да се ограничи или блокира увозот на украинско жито во Полска – рече Моравјецки.
Тој додаде дека се договорил со лидерите на неколку земји кои граничат со Украина да и се обратат на претседателката на ЕК Урсула фон дер Лајен за да се решат споменатите проблеми.
Украина е еден од најголемите светски извозници на жито. Нејзините црноморски пристаништа беа блокирани од почетокот на конфликтот со Русија пред повеќе од една година. Таа беше принудена да најде алтернативни патишта за транспорт преку земјите на Европската унија, пред се Полска и Романија.
Но, големи количини украински житарки, поевтини од оние што се произведуваат во Европската унија, завршија во земјите од Централна Европа.
Министерот за земјоделство Хенрик Ковалчик се сретна со претставници на земјоделците, кои ја отфрлија предложената владина помош како несоодветна.
– Загубите мора да се покријат. Потребни се пари за покривање на секој хектар жито. Тоа значи најмалку шест милијарди злоти (1,39 милијарди долари) – изјави Михал Колоѓејчак, основач на групацијата Агроунија, пред разговорите со Владата.
Споменатата сума е 10 пати поголема од онаа предвидена со програмата за помош од 600 милиони злоти, која беше одобрена од Европската комисија во понеделникот и предложена од полската влада да им помогне на земјоделците да ги надоместат своите загуби.
– Нема да заминам додека не дојдеме до добро решение, а ако тоа не се случи, полицијата ќе мора да не изнесе – рече Ковалчик, кој неодамна мораше да биде придружуван во земјоделски саем во централниот полски град Киелце, откако толпа гневни земјоделци го нападнале фрлајќи со јајца.
За повеќе корисни стории посетете ја рубриката Агро Вести, како и нашите социјални мрежи Facebook и Viber.
Доколку нешто продавате или купувате посетете го огласникот WWW.PETEL.MK
